佔領中環行動「六二二」公投選擇之中，由專上學生聯會及學民思潮主力推介嘅學界方案，若要攞最多票，相信冇乜懸念，之不過我哋收到風，佢哋喺今個月初嘅六四遊行，就住係咪要向警方申請不反對通知書，原來出現咗分歧，據聞搞到雙方心存芥蒂，近日已經少咗合作。
每年六四集會前一個星期日，支聯會都會搞遊行去政府總部，但近年唔少團體都會「接力」再遊行去西環，今年原定由學聯同學民思潮合辦。據聞佢哋一直開會得出嘅共識，就係唔會向警方申請不反對通知書，皆因學聯一直都認為，遊行係毋須政府批准嘅。不過，學民思潮喺遊行前幾日，竟然大搖大擺去咗中區警署申請不反對通知書，學聯見到都為之側目。
所以學聯喺遊行之前一日，公布「基於行政原因和原則考慮」，宣布唔會參加六四遊行，反而喺六四當日凌晨同晚會之後再遊行去西環。據理解，學民思潮解釋轉軚係因為特首講到明唔會向佔中行動發出不反對通知書，所以佢哋今次要試吓警方會唔會就遊行發出不反對通知書。
不過，學聯中人就覺得兩者完全冇關係，更因此質疑學民思潮對公民抗命嘅決心，所以近日就「做番自己嘢」，大家少咗好多合作。政改大戰當前，咪睇學聯與學民思潮班學生哥搞內訌，其實泛民黨派內部一樣係四分五裂，只係大有大分裂，細有細分裂囉！