中環出更:慶祝父親節 名人晒幸福

尋日有唔少人都趁機會大晒幸福同爸爸歡度父親節,享受天倫樂。旅遊作家項明生(James)同立法會議員莫乃光(Charles)就選擇在社交網站,展示童年時與爸爸嘅溫馨合照。相中細個嘅Charles眼仔睩睩,有朋友就留言話,佢同依家樣貌成個餅印咁。而James就上載咗一張爸爸用單車載住佢同哥哥嘅陳年舊照,並感謝爸爸造就今日嘅佢。

項明生感謝父培養

James喺網站透露,爸爸當年從冇送過玩具畀佢,但就用微薄嘅薪水,買咗大量好書畀佢。佢就係靠閱讀《牧羊少年奇幻之旅》及《魯賓遜漂流記》等名著,喺飯都食唔飽嘅七十年代,有狄更斯、雨果、大小仲馬、三毛等每日輪流「陪伴」佢,帶佢出遊世界各地,令佢成為今日嘅旅遊達人兼作家。佢又回想起人生第一次遠征,就係同哥哥坐喺爸爸嘅單車後座上,感受夜風擦過、野花撲鼻香氣及觀賞田野往後奔馳嘅景色,至今仍歷歷在目。

除此之外,單車與爸爸總係令人聯想起溫馨甜蜜嘅畫面,仲係唔少爸爸同子女嘅溝通橋樑,連商務及經濟發展局副局長梁敬國(Godfrey)平日都鍾意同愛女一齊喺科學園一帶踩單車。

梁敬國提早收禮物

而Godfrey父親節都唔例外,一早就由大埔出發踩去上水火車站,但今次只係佢一個幫囡囡探路,等囡囡做完功課先至一齊出動。Godfrey話,前晚已經提早食飯慶祝父親節,仲收到囡囡一份實用又及時嘅禮物添!

卓妮下午又喺沙田馬場見到信興集團副主席蒙德揚,佢帶住太太同囡囡蒙淑美入場歡度父親節。原來佢囡囡同一班靚女同學好少入馬場,所以佢就專登訂咗張枱招呼大家去玩番吓,自己又可以順便出席活動,一舉兩得。見佢囡囡亭亭玉立又咁活潑,難怪蒙德揚笑得咁開心喇。

卓妮

第一手消息請下載on.cc東網iPhone/iPad/Android/Windows Phone Apps