政情：葉振南搞信貸 被封「財神爺」
今年市道麻麻，商家都大嘆生意難做。從事啤酒代理嘅葉振南（Stephen）逆市擴充，六月開辦信貸公司，莫非身家「水浸」？佢笑言家族一向經營的士車行，有做「車按」，眼見信貸市場潛力大，索性大搞。朋友知道佢有錢借，封佢做「財神爺」，又開口問佢「度水」，搞到佢電話接唔停。
此外，有六十幾年歷史嘅汕頭商會換屆在即，據聞現任常務副會長Stephen有望接棒。如果Stephen成功接掌汕頭商會的話，將會係該商會歷來最後生嘅會長，佢話會吸納更多的人才。
汕頭商會八月底舉行會員大會，邊個做會長，好快揭盅。數數手指，Stephen已入會二十幾年，爸爸葉樹林亦係該會永遠名譽會長，難怪特別有感情。坊間商會愈組愈多，個個會鬥搶精英，Stephen亦滿腹大計，一旦當選就會展開「吸才」行動，將引入肯拚搏「家己冷」，又吸納年輕才俊，注入生氣同活力，「活化」汕頭商會。