政情：情迷荷蘭橙 郭偉強名都改埋
四年一度嘅世界盃開鑼，唔少立法會議員日頭苦戰「拉布」後，凌晨都要爬起身捱眼瞓睇波。曾代表立法會足球隊出賽嘅勞工界議員郭偉強（Aron），前晚完成財務委員會會議後，都趕返屋企睇荷蘭狂數衛冕嘅西班牙賽事。Aron自言唔係足球狂迷，但就對荷蘭隊情有獨鍾，仲力撐荷蘭九十年代中場溫達（Aron Winter），所以連英文名都跟人哋改埋做Aron。
洋名源自老將溫達
Aron回想小學六年級先第一次睇波，雖然人仔細細可能連越位係咩都唔識，但已對荷蘭國家隊嘅橙色球衣印象深刻，覺得橙色喺草地上特別搶眼，更對中場溫達個英文名Aron一見鍾情，未識睇波已幫自己改個相同嘅英文名，仲用到依家，自此對荷蘭隊有情意結，但似乎冇咩人知佢叫Aron。講開橙色，佢所屬嘅工聯會都以橙色做主調，唔通當年係因為咁而加入工聯會？