六四維園晚會日前曲終人散，大會宣布當晚有逾十八萬人進場悼念六四。雖然泛民主派做親搞手嘅晚會、遊行都被質疑「報大數」，但建制派多年來對六四晚會都選擇出少句聲當幫忙，以免再挑起火頭變相幫泛民谷人數。不過，立會議員蔣麗芸（Ann）似乎唔係咁諗，仲特地摷番○九年報章報道，質疑「維園能坐十八萬人嗎？」結果梗係再惹爭議啦！
六四維園晚會事隔兩日，阿Ann無端端喺社交網站引用報道，指有香港大學學者認為，即使維園逼爆都只能容納約七萬至十萬人，質疑○九年大會宣稱有十五萬人出席晚會係咪「報大數」。雖然阿Ann有唔少「朋友」都留言支持佢嘅睇法，但亦有人留言鬧爆佢嘅支持者係「土共」。
阿Ann隨即留言為「朋友」擋箭，澄清自己只係畀資料大家參考吓，社會有唔同聲音好正常，唔好動輒話人「土共」喎，仲話「你不高興就天天來駡我好了！」阿Ann喺風頭火勢發表咁惹火嘅言論，又唔知目的何在，有時谷人氣都唔一定要靠博鬧嘅。