政情：今日你上鏡：李大壯熱到唐裝都唔着

近日天氣酷熱難擋，氣溫持續喺攝氏三十度左右，連平日鍾意以唐裝衫現身嘅香港－台灣商貿合作委員會主席李大壯，都難頂悶熱高溫，喺啱啱過咗嘅周日一改形象，以運動衫配短褲現身金鐘港鐵站。近期積極減肥嘅李大壯，身形愈來愈弗，當日見佢同一名女子及着白衫嘅小童行完商場後，齊齊前往港鐵站搭車。不過，可能李大壯平日習慣駕駛私家車出入，見佢哋三人都冇八達通，要喺金鐘站排隊買單程車票，其後登上往柴灣方向嘅列車離開。