正當內地反貪打黑如火如荼之際，赫然見到「貪曾末路」四個醒神紅字，確如晨光第一線，刺激老朽嘅老花眼！係真唔係吖？歎盡省港澳、貪盡海陸空嘅前特首曾蔭權爵士終大限已到？若然，廉署嘅「廉潔奉公」金漆招牌有望再在維港迎風招展！
貪曾劣行醜事經東方報業集團於一二年二月獨家踢爆後，廉署若然咁都做唔到嘢，的確使人失望！貪曾禍港七年，給人印象最深刻的就是一晌貪歡，最愛同富豪勾勾搭搭，接受私人飛機及豪華遊艇等奢華款待，又疑獲廉價租住「深圳禮賓府」以及藏有大量來歷不明嘅貴價酒……
與富豪勾搭上癮，完全不顧及作為行政長官應有嘅身份；「上癮」呢家嘢，簡言之，即係嚴重地依賴或者迷戀一種事物，唔使話係吸毒咁大件事，如今的「低頭一族」，機不離手狂發短訊亦是上癮；英國有個女侍應叫塔瑪拉‧克瑞里，變態到只要離開自己嘅手機一陣，佢就覺得周身唔聚財，克瑞里不僅把手機稱做「我的寶貝」，而且把手機插在乳罩裏邊，緊貼着肌膚，隨時感應短訊發來的聲音和震動；看來，佢不單止上癮，直情上埋身！
貪曾做特首，觀其言行，為政除了吹水十大建設、六大產業，金融業養千萬人外，其行，老朽亦只見其勾搭富豪上身，豪奢極慾，未見其為香港市民謀甚麼福祉也！
前廉署主任林卓廷表示有關調查報告已提交律政司，而律政司回應傳媒查詢亦稱「正考慮相關資料」，種種迹象意味案件已露出曙光，林促請廉署及律政司勿再拖延，盡快作出檢控，令案件盡快水落石出，不要再愚弄香港市民。
廉署要重拾清流，老朽認為要從源頭滅污做起，若然放虎歸山，再拍多多的宣傳片也難挽回信譽，一句講晒：行動最實際！