政情：敏感時刻 林健鋒辭新昌非執董
高鐵超支延誤事件餘波未了，由港鐵組成嘅獨立調查委員會，仲未公布調查結果，但睇嚟今次高鐵風波一定涉及唔少人。我哋最新打聽到，行政會議兼立法會議員林健鋒（Jeffrey）咁啱喺高鐵風波爆發後半個月，火速辭去同港鐵關係密切嘅新昌營造獨立非執行董事一職，唔知喺呢個敏感時刻跳船，係咪有特別原因呢？
有份幫港鐵做地基
按照一般情況，上市公司獨立非執董係一個類似顧問嘅職位，一個月都未必要開一次會，基本上好多政界中人都一人身兼數個非執董職位，甚少主動辭職。但據悉Jeffrey喺今個月初，就毅然向行政會議秘書處表示，自己已經辭去新昌非執董。秘書處亦反應好快，今個月十二號已經更新咗資料。
高鐵風波喺四月中被踢爆，而心水清嘅人就知道，新昌其中一名熟客仔就係港鐵，基本上由高鐵到沙中線，新昌都有份幫港鐵做地基工程。但Jeffrey突然辭職，而且又冇其他人頂上，似乎走得好急喎，唔通佢擔心日後立法會第日要調查高鐵事件，所以預早辭職避嫌？Jeffrey解釋，因為他已服務了新昌十多年，所以是時候引退了。