政情：中環出更：范國威工作報告惹抄襲疑雲
立法會議員范國威（Gary）以主打反對個人遊殺出一條血路，近日仲發表咗佢嘅工作報告，連同立法會資料研究組早前發表嘅「自由行研究簡報」一齊出版。不過，我哋就收到讀者投訴，聲稱Gary未有喺工作報告表明研究簡報嘅出處，一睇以為係佢自己做嘅，如果以學術標準評價，直頭係抄襲喎。
資料來源標示字體細
睇番Gary份十四頁工作報告，封面就有佢嘅大頭相，封底都有寫明係「自由行研究簡報」，並加上立法會個標誌。至於內文，當中十二頁都係引述研究簡報，最後一頁有寫明資料係來自「資料研究組」，但字體唔係太大，難怪有人會誤會。
我哋問過Gary，佢就話唔使擔心，因為工作報告一早標明係取自資料研究組，呢份報告係可以複印，只要準確引述就可以。佢仲話，呢份工作報告藍本一早畀咗資料研究組審閱，申請撥款前亦已問過立法會會計部，佢哋都冇話有問題，做足「防風措施」咁話。不過，Gary都承認，網上版本可能睇唔到咁仔細，印刷版或者會睇得清楚啲。
卓妮