政情：中環出更：周浩鼎攜孕妻行街甜到漏
經常在城市論壇與泛民主派正面交鋒嘅離島區議員周浩鼎（Holden），其建制派急先鋒形象鮮明，十足心口寫個勇字嘅鐵漢咁款。不過，鐵漢亦有柔情一面，早前卓妮喺中環就見到Holden同腹大便便嘅太太Alice行街，兩公婆十指緊扣，有傾有講，Holden更不時摸吓Alice嘅肚仔，行多兩步又互相錫嘴，真係甜到漏，同論壇戰場上嘅佢判若兩人。
當日Holden同任職國際傳媒機構嘅Alice先喺中環中匯大廈現身，然後行到置地大廈，之後又去太子大廈一間嬰兒用品店閒逛。Holden話，太太佗緊BB仔，預產期就係呢幾日，當日佢陪太太做產前檢查，然後去買啲嬰兒用品。
首胎佗B仔準備足
咦？BB仔就嚟報到，嬰兒用品仲未買齊咩？Holden笑笑口話，其實自己買啲，朋友又送啲，一早已準備好晒，但好似永遠覺得買唔夠，所以咪同太太再去行吓囉！
今次係佢哋嘅第一胎，但兩人好似好淡定，做好晒準備。Holden話，呢胎計劃自然分娩，所以一早就執定裝有衫褲鞋襪嘅「走佬袋」，方便隨時到醫院，陪太太一齊入產房，第一時間迎接寶貝囝囝。
卓妮見Alice依然行得非常輕盈，但原來佢重咗四十磅咁多。不過，Alice好勤力做適量運動，包括游水，所以自然分娩實難唔倒佢。榮升爸爸咁開心，梗要同好友分享，Holden話，早已買定十六斤靚薑煲薑醋，到時會大派畀地區同事喎！
卓妮