政情：撐設創科局 莫乃光畀泛民插
下個月政府將向立法會提出成立創新及科技局嘅決議案，支持成立創科局嘅資訊科技界立法會議員莫乃光（Charles）就搶閘喺立法會內務委員會提出成立小組委員會討論，點知就畀泛民鬧爆，質問Charles咁撐開局，係咪業界有錢分？公民黨議員郭家麒仲嬲到話要同Charles「割席」添。其實Charles今次為業界發聲，變身「建制派」都無可厚非吖！
被質疑有錢分
一早揚言拉布嘅議員陳偉業話，之前政府話設科技局又話支持、依家成立創科局又話支持，政府話要咩就支持咩，簡直係搵香港人笨。議員黃毓民就批評設立創科局係疊床架屋、浪費公帑，仲問Charles支持創科局係咪有錢收喎！
Charles聽到扯晒火，批評毓民侮辱業界，又話希望大家可以支持成立創科局，畀條路年輕人行吓。雖然泛民個個唔係投反對票就係棄權，但係動議喺建制派支持下最後都係大比數通過。