政府為咗起屋「盲搶地」，最近向多個區議會提出改變土地發展用途建議，結果一係被否決，一係受到好大阻力。特首梁振英（CY）尋日特別邀請沙田、葵青及元朗區會主席、黃大仙區會代表一齊食晏探風，但係聽聞區議會代表同官員喺會上只係互吐苦水，未達共識，莫非大家嘅分歧真係咁大？
尋日陪CY出席飯局嘅仲有發展局局長陳茂波、房屋及運輸局局長張炳良、民政事務總署署長陳甘美華等人。據聞官員喺會上話，當局已盡力搵地建屋，但做好事都得唔到區議會支持，所以冇晒計，質疑區議會空口講支持，但係一見到政府提交嘅土地房屋發展用途建議，就「搬龍門」增加訴求。不過出席嘅區佬就反駁話，佢哋確係支持興建公屋，只係政府冇乜誠意解決問題，仲投訴地區官員出席會議時，一係乜都話唔得，一係乜都答唔到，好唔專業喎。