政情：中出爭霸戰茶杯裏「修」好
今年適逢唔少商會及社團換屆，各家不時傳出激烈嘅會長之爭，劇情峰迴路轉，高潮迭起，好過睇戲。繼中華廠商聯合會（廠商會）將於年底前選出新會長，據悉中華出入口商會（中出）亦已啟動選舉工程，大約喺十月份選出新班子以便明年初換屆。聽聞今次幾位中出副會長都有興趣參選，包括張學修、許華傑（Michael）及李秀恒（Eddy）。咦？Eddy唔係想選廠商會會長嘅咩，點解喺差不多同一時間舉行嘅中出會長選舉又會有佢份？
我哋第一時間向Eddy求證，問佢係咪想參選中出會長，Eddy聽咗都打個突，答話：「吓？冇諗過喎！你咁講我都好突然。」咁佢係咪繼續堅持參選廠商會會長？Eddy就好輕鬆話，選會長係年底嘅事，依家忙住公司嘢先喇，唔得閒諗住。聽落佢又唔似棄選廠商會喎。
可靠消息人士話畀我哋聽，查實早喺一○年底中出換屆選舉時，當時Eddy係最資深嘅副會長，照計輪到佢做會長，但由於當時Eddy忙於公司轉型及幾項大型投資，怕抽唔到時間，所以先讓畀現任會長莊成鑫做。據聞去年初莊成鑫連任前，曾經請Eddy做番會長，但都被對方婉拒。日前中出啱啱成立由十一人組成嘅換屆委員會，籌組下一屆新班子嘅推薦工作，莊成鑫、張學修、Michael及Eddy都係成員，其中張學修、Michael都有意參選會長，但係Eddy確實無表態過。
內部協商 撐張學修接棒
不過講到底，中出內部都係好和諧同齊心嘅，聽聞佢哋響應政府「有商有量」嘅號召，已經勸服Michael打消參選會長念頭，事關佢仍然爭取緊喺一六年代表中出參選立法會進出口功能界別，到時冇理由佢一個人戴兩頂帽，既係中出會長，又係立法會代表，容乜易顧此失彼。會中重量級大佬又認為，會長之位應該由老成持重、有社會地位，又有時間投放喺商會嘅人出任，所以，大家都支持做過海南商會會長嘅全國政協張學修接棒，平息咗呢場茶杯裏的風波。