中環出更：上立會無人識 商經副局梁敬國好瘀
立法會拉布戰尋日終於落幕，不過喺落幕之前，發生咗一段問責官員無人認識嘅瘀事。話說尋日下晝三點半，商務及經濟發展局副局長梁敬國（Godfrey）代表政府坐喺官員席聽議員發言，全程無人認得佢，連一向精明嘅主席曾鈺成都唔知佢係乜水，仲要佢自我介紹一番，認真（火羅）爆。
誤當環局官 曾鈺成（火羅）爆
話說喺立法會復會後冇耐，社民連梁國雄（長毛）準備繼續就修正案發言時，突然問曾鈺成，政府現時派出邊個局嘅官員列席？曾鈺成被考起，望足Godfrey幾秒鐘，都認唔出佢係乜水，氣氛極之尷尬，期間成個議事廳鴉雀無聲，只得長毛不時發出幾次訕笑聲。最後曾鈺成惟有向身旁嘅秘書求救，兩人研究咗十幾秒，曾鈺成先宣布，按照政府嘅通知，呢節出席嘅應該係環境局官員。嘩！唔係嘛！Godfrey聽到主席咁講，面色真係好難睇，猛咁苦笑搖頭，最後曾鈺成惟有叫Godfrey介紹吓自己。
下屬被嘲 風「蘇」晒新鞋
雖然Godfrey畀班議員笑到面都黃，不過佢上司商經局長蘇錦樑（Greg蘇）就心情大靚，傍晚好風騷咁喺立會周圍晒佢對新鞋。佢話尋日朝早去咗中環嘅元創坊（PMQ）參觀，仲用咗二千幾蚊買咗對由本地設計師設計嘅新款皮鞋。睇到呢度，大家都知道佢畀幾多心機打呢份工喇！
卓妮