中環出更：名人怕彊局多過泰政變
泰國政變，局勢混亂，嚇到港人避之唯恐不及，但都有人話未驚過。香港品牌總商會會長兼「假髮大王」趙振國（CK）笑言，泰國每三幾年就政變一次，改朝換代係「家常便飯」，反而新疆頻頻發生恐怖襲擊嚇死人，炸死無辜百姓冇陰功。副會長黃業光（John）就話，有喺新疆經營五星級酒店嘅朋友嚇到唔敢出街。
John自爆話，泰國政變後，有喺當地經商嘅友人致電報平安，話人身安全無問題，不過手上揸住唔少泰國股票同埋物業，近日泰銖暴跌，都咪話唔驚。咁又係，泰國政變後接住實施宵禁，三日內即刻有逾四億美元外資逃離當地股市，長遠好影響外資對泰國嘅信心。
不過諷刺嘅係，泰國政變冇鬧出人命，反而返內地就好危險。John話，有位喺新疆開酒店嘅老友仲慘，睇見暴徒橫行，又斬又殺，嚇到有得震，冇得瞓，近日連街都唔敢去，暫時匿埋屋企先。
趙振國從政睇天時地利
講番CK最近加入新民黨做中委，又創立品牌總商會，動作多多，引起業界關注，唔通佢想捲土重來，再次挑戰批發及零售界立法會議員方剛？CK笑笑口叫大家唔好諗多咗，仲話從政係要配合天時地利，唔係佢想選就選。咁啱尋日方剛黨友鍾國斌（Felix）都去撐場，莫非係去刺探「軍情」？Felix就答話，只係以朋友身份去支持，唔關政治事喎！
卓妮