中環出更：羅永順 劉文文世交結善緣
多個慈善團體先後換屆，尋日終於輪到九龍樂善堂常務總理會喺尖沙咀舉行就職典禮，羅永順（Andrew）喺前主席韓世灝手上接棒成為新一屆掌舵人，延續服務社會嘅責任。講起佢同樂善堂嘅淵源，佢話自己細個因為喺九龍城搭飛機，又會經常喺該區食嘢，所以對該區充滿獨特情感，佢期望未來一年着手幫助較少人關注嘅社群，例如老人及少數族裔等。
見Andrew同香港吸煙與健康委員會主席劉文文（Lisa）老友鬼鬼，原來佢哋已經相識多年。話說Andrew當初喺Lisa爸爸介紹之下加入樂善堂，皆因佢哋兩個家族都係布業世家，二人父親非常熟絡，所以下一代都變成世交。
羅掌樂善堂 劉「降班」做總理
曾任樂善堂主席嘅Lisa已離開咗一段時間，佢就笑自己要「降班」做番總理，仲帶埋細佬劉文東一齊加入添。卓妮同場仲見到羅氏宗親會成員羅少雄及羅詠詩（Anthea）現身支持Andrew。Anthea就大爆副主席施家殷（Kyran）曾經當選過某酒品牌香港型男。Kyran就透露自己一直有做男士美容，每星期都會搵兩日保養，尋日仲開心分享近日植髮嘅成果，發現前額真係多咗啲頭髮，喜上眉梢。
早前因為「廁所上堂」言論惹來批評嘅教育局常任秘書長謝凌潔貞亦有出席，被問到其言論係咪過激時，佢就澄清絕冇醜化教育界嘅意思，只係諗住舉個具體例子，等大家明白好難喺學校搵到另一個冇人上堂嘅空間。
至於點解唔用禮堂或操場做例子，佢就解釋係因為呢兩個地方都可能會喺唔同時段有人上音樂或體育課喎。照佢咁講，莫非廁所就冇人用嘅？
卓妮