中環出更:東南亞動盪 港商進退兩難

港商在境外設廠,除咗考慮內地之外,越南都係首選之一。不過,越南最近發生反華示威,嚇到港商雞飛狗走,吸引度跌晒分。中華廠商聯合會(廠商會)副會長李秀恒(Eddy)慨嘆越南有排華、泰國有政變、菲律賓有水災、印尼有火山爆發,各國問題多多,港商想「搬竇」去東南亞,真係揀唔落手。

盛傳有意拗手瓜競逐廠商會會長嘅Eddy,日前現身廠商會八十周年慶功宴,講到越南排華波及外商,Eddy都話關注,據知暫時冇港商受牽連。雖然隔岸觀戰,但越南出事,意味港商又少個可以設廠嘅選擇。

內地人工暴漲

不過,受內地人工暴漲影響,港商搬廠去東南亞始終係大勢所趨,相信緬甸及柬埔寨會係廠商嘅最後選擇。

盛傳因為早前廠商會出現會長之爭,搞到班會董左右做人難,但慶功宴上,又唔覺大家面阻阻。晚宴由行業委員會主席何偉權(Ken)請客,喺旗下酒樓擺四圍。常董黃家和、史立德、李慧芬及前行政總裁梁世華(Paul)等人都有出席。早前在會慶上扮演徐小鳳嘅會董吳國安,大爆當晚「真空上陣」,咁搏為乜?皆因大會安排嘅胸圍太窄,搞到佢着唔落喎。

當晚阿Paul坐足全晚,佢離開商會後幫朋友間公司擔任顧問,又係香港海事青年團副主席,負責籌劃訓練課程,佢仲展示一張着上白色制服相,似乎對現況好滿意。

卓妮

第一手消息請下載on.cc東網iPhone/iPad/Android/Windows Phone Apps