慈善基金：患癌阿金盼援手創生命奇迹

「嗰陣好似孭住四個計時炸彈喺身，脾、肝、胰臟同左腎上腺都有腫瘤。」回憶當日病危情況，五十四歲的阿金坦言猶如一場噩夢，至今仍有餘悸。阿金憶述，當日確診罹患癌症後，不但原有生活即時被打亂，更要面對沉重的經濟壓力，「醫生話我身體頂唔住做化療，得番標靶藥有機會控制到個病，但就要成三萬幾蚊一個月，以當時嘅家庭環境點負擔得起。」

腫瘤縮細 真係好開心

病魔無情，幸而人間有愛。阿金的情況經報道後，旋即獲各方善長支持，阿金不但及時得到治療，病情更出現突破性進展，令阿金與家人均為之鼓舞，「估唔到東方日報慈善基金呼籲之後，社會真係會有咁多人幫我，更加估唔到嘅係啲藥居然控制到我個病，醫咗年幾，四個腫瘤依家開始縮細緊，真係好開心！」

感激善長親筆信鼓勵

能夠及時獲得治療、病情有進展固然感到鼓舞，但最叫阿金感動者，卻是善長的關心與鼓勵。有善長以「有心人」作署名撰寫親筆信，鼓勵阿金勇抗癌魔，「雖然同咁多位善長素未謀面，但佢哋嘅心意我完全感受到，好多謝寫信畀我嗰位有心人，我一定更加堅強！」

另外，阿金亦將經歷及心得鼓勵病友，「我病成咁都捱得住，證明冇嘢係冇可能，最緊要係心境開朗。」

雖然病況已漸有改善，阿金卻未敢鬆懈，每天堅持外出散步，保持最佳狀態對抗癌魔，「老公每日都會陪我行公園，孫仔都好錫我，有時見我上樓梯唔夠力，就會喺後面推我上去！」不過，隨着善款耗盡在即，阿金亦開始為每月高逾三萬元的藥費而擔心，「好多謝善長咁耐以嚟嘅幫忙，亦都好希望大家繼續幫手，如果唔係我可能隨時同屋企人永別！」

捐款編號︰12215

記者︰何穎賢、呂耀焜