政情：快必落天耀 瞄準梁志祥
區議會選舉明年底舉行，有意參選者依家落場做地區工作試水溫都唔算遲，其中上屆一直打正旗號狙擊民主黨（白鴿黨）嘅人民力量，我哋聽聞佢哋嘅成員譚得志（快必），今年起密密去天水圍天耀選區做地區工作，睇嚟志在參選，仲要一嚟就想搶奪民建聯雙料議員梁志祥個議席，真係藝高人膽大。
我哋問過快必，佢承認由今年初農曆新年前後，開始跟人力新界西立法會議員陳偉業（大舊）落去天水圍天耀區幫手寫揮春，跟住就打蛇隨棍上兼職做社區總幹事，每月收二千元人工，繼續喺該區搞活動，仲跟進輕鐵巴士重組，連屋邨晾衫架都理埋。
倘白鴿出賣選民 「要滅佢黨」
咁係咪諗住決定參選？雖然快必把口話自己係初生之犢，暫時跟住大舊，唔知可唔可以挑戰到大老虎，但就話上屆梁志祥自動當選，好多居民話想有人挑戰喎，擺到明做定功課。人力打民記，白鴿黨咪好開心？快必講到明，如果白鴿黨喺佔中或真普聯講一套做一套，出賣選民，唔止要佢票債票償，仲要滅佢黨喎！