政情：內地反貪腐 法酒花跌價兩成
內地打貪，豪飲風氣受打擊。被捧至天價嘅法國佳釀忽然「失寵」，連帶法國五大一級酒莊嘅「酒花」都跌價一成半至兩成。做酒生意嘅香港專業及資深行政人員協會會員麥鳳儀（Stella）坦言，名酒酒花今年嘅售價創近五年來新低，雖然嚇窒一眾紅酒投資者，但就吸引一批收藏及用家趁低吸納。
三、四年前投資「酒花」氣氛一直好熾熱，不過去年已見勢頭唔啱，先係收成期撞啱波爾多落雹，葡萄一度失收。所謂物以罕為貴，大家以為酒花會加價，點知遇上內地嚴打貪風，豪客失晒蹤，結果去年Lafite酒花售價下跌兩成至三千五百港元。雖然酒花大跌價，但係咪入得過就好考眼光。Stella話，名酒好似藍籌股，有一定價值，低位唔怕吼。不過投資無話實賺，最緊要量力而為。