政情：曾鈺成唔剪布 反咒議員失聲
立法會主席曾鈺成同議員蔣麗芸（Ann）尋日又再一齊開生日會，一眾議員同僚趁中午休會幫佢哋慶生。生日又再適逢拉布，曾鈺成坦白話，近日有某議員話，如果唔想佢喺議會內講嘢，一係就係佢病咗，一係就係出唔到聲。曾鈺成自言今年嘅生日願望就係同呢樣嘢有關，仲自嘲「唔係好好心」。其實曾鈺成與其「詛咒」人哋，為自己添口孽，不如落手剪布仲好喇！
老婆曾呷醋 拒麗芸錫錫
尋日係阿Ann正日生日，曾鈺成就係今日生日。記得去年此時立法會又再拉布，期間阿Ann幾次發言都被曾鈺成寸爆，搞到阿Ann好冇癮。後來曾鈺成趁兩人一齊切蛋糕時，錫咗阿Ann一啖，算係一吻泯恩仇。尋日大家起哄叫阿Ann錫番曾鈺成一啖。不過曾鈺成就耍手擰頭，原來去年曾太見到佢同阿Ann錫錫張相後，嬲足三日，所以今年佢唔敢再作反喇！
着到紅噹噹嘅阿Ann就一本正經咁話，有位喺伊拉克返港嘅朋友同佢講，見到當地通街都係荷槍實彈嘅人，返到香港就覺得好平安同開心，希望大家一齊建設好香港咁話。