政情：星爺拗氣 助長業「布」
財政司司長曾俊華前日先大鑼大鼓召開緊急會議，批評立法會大會、財務委員會同工務小組三線拉布，隨時搞到政府面對財政懸崖。言猶在耳，財委會尋日就上演咗一場拉布鬧劇，反對新界東北規劃前期撥款嘅陳偉業（大舊），搞到主席吳亮星（星爺）暈頭轉向，竟然嘥晒時間喺度辯論應唔應該辯論，間接幫泛民拉布，令人哭笑不得。
泛民群起圍攻
財委會由五月初開始，已就古洞北同粉嶺北新發展區前期工程撥款展開討論，但一直被多名泛民議員拉布拖延。尋日大舊又出招，質疑吳亮星係新鴻基地產旗下數碼通獨立非執董，而新地喺新界東北持有多幅土地，所以存在利益衝突，話佢唔應該主持會議。
星爺就解釋話，數碼通唔會因為新地發展新界東北而有直接或間接金錢利益，所以唔會避席。點知大舊即場提出動議要求主席處理呢個動議時避席，星爺就反駁話，呢個議題好簡單，想即刻投票表決。此時泛民議員群起圍攻，不停舉手發言，質疑星爺點解唔畀人講嘢。泛民就咁你一言、我一語，好似喺街市買餸咁，亂晒籠。
星爺就不停打斷議員發言，反駁泛民質疑，仲好唔客氣叫街工梁耀忠收聲，成班議員即刻起哄，連林大輝都叫星爺暫時休會。點知星爺唔肯制，仲話如果休會咁就沒完沒了喎，結果塊布就愈拉愈長。多名議員冇面畀，直批星爺唔識主持會議。財委會副主席劉慧卿就質疑佢句句駁議員，插嘴三十次，叫佢要尊重會議，唔好搞到財委會面目無光，「面係人哋畀，架係自己丟」，成班泛民議員即刻拍晒手掌。林大輝則「大師」上身，話星爺情緒不穩，動咗真氣，叫佢深呼吸、定定神喎！
吳稱大舊屈佢
最後呢場大龍鳳搞咗一粒鐘有多，之後又用咗一粒鐘處理避席動議，點知連投票都處理唔到就夠鐘收工，下次再嚟過。財經事務及庫務局局長陳家強全程托腮齋坐，過咗一半議程就無奈走人。
星爺事後聲稱一早預咗有人拉布，仲話大舊明屈佢有利益衝突，係「欲加之罪、何患無詞」。又話佢唔係動真氣，而係為港人爭啖氣，如果避席此例一開，後患無窮。睇嚟星爺得閒要練吓EQ（情緒智商），唔係下次又中招幫人拉布點算？