中環出更：新民黨公記扒龍舟 加強融合
新民黨同公民力量（公記）早前未拍拖先「閃婚」，結盟三個月來傳出過唔少磨合問題。卓妮尋日中午就喺立法會宴會廳撞到佢哋，原來係身兼立法會議員嘅新民黨主席葉劉淑儀同副主席田北辰，請咗十多位公記成員嚟立法會食飯，一邊抗拉布、一邊聯誼。佢哋離開時咁啱遇上大雨，葉太就笑言代表咗佢哋「風雨同路」喎。
葉劉囡囡會落場
葉太又透露，佢哋嚟緊會去珠海橫琴旅行，喺當地一間新開張、以海洋世界為主題嘅度假區共度一宵，新民黨同公記嘅黨員、支持者同義工，合共有成近一千人參加，要十幾架旅遊巴先載得晒。之後佢哋仲會組隊參加下個月嘅端午節龍舟賽，葉太囡囡葉榮欣都會落場。不過扒龍舟好講默契，唔知兩批人到時夠唔夠合拍呢？
去完旅行、扒完龍舟之後，新民黨同公記仲會搞個集思會，傾吓點樣加強雙方融合，以及明年區議會選舉同一六年立法會選舉嘅部署。搞聯誼、搞選舉，全部都要用錢，葉太就話經費問題佢哋當然會諗，從來毋須個別黨員為個黨籌款。
卓妮