中環出更：美荷樓活化 名人話當年
石硤尾邨美荷樓係香港碩果僅存嘅「H」形徙置大廈，經活化後被評為二級歷史建築，一磚一瓦都係歷史嘅見證。尋日有團體邀請城中名人分享美荷樓嘅獨特回憶，喺深水埗長大嘅深水埗區議會主席郭振華（Jimmy）就話，小時候對美荷樓嘅印象係「好震撼」，點解？
Jimmy細個時住喺巴域街第廿四座，平時行去街尾嘉頓麵包廠附近飲茶都會經過美荷樓。佢話，每逢十月十日「雙十節」，美荷樓街坊就會懸掛一幅巨型青天白日滿地紅旗，當時細細粒嘅佢覺得非常震撼。Jimmy仲話，細個佢好鍾意喺屋企附近嘅街坊會踢波，踢到夜一夜都唔捨得走，經常要佢爸爸捉佢返屋企食飯喎！
孕育傳奇名將
擔任美荷樓生活館工作小組顧問嘅歷史博物館前總館長丁新豹話，美荷樓有數之不盡嘅故事，又曾經孕育唔少傳奇人物，前香港足球員陳發枝嘅童年就係喺美荷樓渡過。佢話，想當年港隊實力強勁，連南韓隊都係手下敗將添！
教育局局長吳克儉就話，喺大學修讀社工系時都有去美荷樓探訪，當年香港制水，佢仲有份幫老人家將一桶桶水搬上樓。佢又話，有聽過美荷樓出咗一名球星陳發枝，自言都好鍾意踢波。咁啱大會送贈唔同嘅童年玩具畀嘉賓時，吳克儉收到一個西瓜波，見佢即刻笑晒，仲即場用手拍打試下嗰波嘅彈力，個畫面都幾趣怪。
主辦活動嘅香港青年旅舍協會行政委員會主席廖仲賢話，佢身為律師，早年經常去北九龍裁判法院打官司，周不時都會行經美荷樓，見到唔少老人家喺樓下公園曬太陽，感覺分外輕鬆。五、六十年代嘅香港，確有另一種美態。
卓妮