末期抗癌勇士 拚死攔車擒賊
醉酒佬搶的士瘋狂舞龍兩公里，末期抗癌勇士「夠薑」攔車擒賊。一名滿身酒氣的赤膊男子，昨凌晨於佐敦道搶走一輛的士，駛至兩公里外尖沙咀天星碼頭巴士總站玩「碰碰車」，猛撼石柱及鐵欄，更燒胎逾十秒，引起途人圍觀，其中一名鼻咽癌症末期患者「睇唔過眼」，上前拉開車門喝令對方落車，反被他持雨傘篤眼險盲。警方趕至制服的士賊，他涉嫌酒後駕駛、無牌駕駛等五宗罪被捕。挺身而出的勇士謙稱只是盡公民責任，坦言：「唔好話我有冇Cancer（癌症），你唔啱梗係要出聲，我理你係邊個！」
被捕男子姓許（四十歲），昨凌晨一時許，他赤膊上身，在佐敦道近吳松街醉醺醺走近一輛的士，喝令姓羅（五十九歲）司機落車，羅未有理會，詎料對方不斷拉扯他，又用鎖匙指嚇，羅為安全起見，只好落車並報警。許隨即跳上的士駛走，的士沿路橫衝直撞，馳至兩公里外的尖沙咀天星碼頭巴士總站行車通道時，繼續舞龍，一度狂撼石柱，又倒後撞爛路邊鐵欄，車頭及車尾嚴重損毀，其後車身被卡住時，車賊更不斷踩油燒胎，有途人見狀報警。
喝令下車 險遭傘篤盲眼
此時，男途人盧金勝（四十四歲）剛於鐘樓附近飲酒，期間發現大批市民於巴士站旁圍觀，於是上前「八卦」。盧憶述：「當時我見到有架的士喺行車道打橫擺，褪前褪後，隊嚟隊去，跟住我叫司機落車，佢唔肯，跟住我報咗警，再埋去拉開車門叫佢落車，其他圍觀嘅人郁都唔郁，突然佢喺司機位嗰度唔知點隊把遮，隊到我爆晒廠，篤上啲眼都盲埋啦，我搶番佢把遮篤番佢，警察就嚟到，仲以為我打個司機。」
「唔啱要出聲 理你邊個」
警員到場經調查後，將盧送院治理，涉案醉漢則涉嫌酒後駕駛、襲擊致造成實際身體傷害、擅自取去交通工具、無牌駕駛及在沒有第三者保險的情況下駕駛五宗罪名被捕帶署，案件分別交由油尖警區刑事調查隊及西九龍交通部交通意外調查隊跟進。被搶去的士的羅，由警員載返現場助查。盧事後坦言：「我怕咩事，我本身有Cancer，四期，鼻咽癌。我擴散咗冇得搞，○七年到依家都未死！唔好話我有冇Cancer，你唔啱梗係要出聲，我理你邊個！」他又指：「你褪咗個頭出嚟，隊到人咁點算呀？始終都要有人出聲，但又好多人喺度圍觀，依家好多人都係咁，雖然有人報警，但差佬未嚟，我咪埋去阻止佢。」