中環出更：社民連「招兵」 搞抗爭青訓班
「佔領中環」行動蓄勢待發，教育局局長吳克儉（吳得掂）前日率先警告教育界唔應該鼓勵學生參與佔中，提早出口術截擊民間招攬學生加入佔中行列。不過，向來走在社運最前線嘅社民連當然懶理教育局「溫馨提示」，緊接推出「抗爭青年實習計劃」招兵投身社運，不但標榜由主席梁國雄（長毛）親自督導，更不設年齡限制，分明同教育局唱反調。
實習生按興趣跟師傅
根據社民連上載社交網站嘅「廣告」，實習計劃主要向大專生埋手，加入後就政改、全民退休保障等議題進行政策研究、地區宣傳同組織行動，咁佔中係咪實習工作一部分？社民連副主席吳文遠透露，實習生加入後會按興趣「跟師傅」，「行動派」就跟「掟飯男」黃浩銘學嘢，吳文遠就負責「文鬥」，傳授政策研究經驗。
吳文遠仲話，幾年來一直有支持者自薦投身社運，今年只係因應政改等火辣議題，作出策略性部署招兵，雖則酬勞只係小量車馬費，但相信會吸引唔少支持者加入。咁講法，吳得掂係咪應該先處理呢班社運青年先呢？
卓妮