中環出更：拉布禍害 議員食不安心
立法會「拉布」戰踏入第六日，「拉布」三子本死豁出去就冇得好講，但建制派議員則抱怨「拉布」三子搞到佢哋食唔安坐唔落，困坐會議廳真係兩敗俱傷。議員陳恒鑌（Ben）擔心不斷響鐘召回議員開會，長此下去會有幻聽甚至職業性失聰；議員麥美娟（Alice）就大呻因為響鐘搞到食餐飯都唔安樂。不過，議員謝偉銓（Tony）反而話自己受惠於「拉布」戰，咁神奇？
陳恒鑌 地盤耳筒抗鐘聲
原來Tony早前因為視網膜過薄而要接受激光手術，手術後要每隔四小時滴一次眼藥水，佢笑言，其實受惠於「拉布」，所以工作量冇咁大，實得閒準時滴眼藥水喎！不過，唔係個個議員都好似Tony樂觀，好似阿Ben就相當抗拒煩厭嘅響鐘聲，為免出現幻聽，佢特地買咗個地盤專用耳筒阻隔鐘聲，透露耳筒連地盤打樁機噪音都阻隔到，如入無人之境，難怪買多個畀黨友何俊賢「享受」。
建制派議員除咗大呻耳仔受罪外，又批評「拉布」議員特別鍾意趁用膳時間要求響鐘召回議員，搞到佢哋想坐定定食餐飯都唔得，可能要隨時折返立法會。阿Ben就計算過自己最高步速，只要響鐘約十分鐘起步離座都趕得切返會議廳「打卡」報到。Alice就自嘲跑得慢，響鐘八分鐘就要開始起跑，否則就趕唔切，分分鐘成為流會罪人。
一餐分幾次 隨時腸胃病
阿Ben擔心一餐飯分咁多次食，長此下去會出現腸胃問題，決定唔食湯麵、白飯呢類唔擺得耐嘅食物，特別推介撈麵或者壽司呢啲乾身嘅食物，咁就唔怕食壞腸胃啦！其實一餐飯分幾次食都唔算慘，事關政制及內地事務局副局長劉江華曾經同人講，自己做議員時，就因為「拉布」而搞到去廁所都要分幾次去，睇怕都冇人夠佢慘啩？
卓妮