政情：王庭聰雙喜臨門
香港工商總會會長王庭聰大女王麗霞（Crystal）去年底註冊結婚，今年初補擺喜酒時冠蓋雲集，話咁快Crystal已經造人成功。尋日卓妮遇見王庭聰一家人，佢難掩即將升呢做外公嘅喜悅心情，仲加料自爆細女亦即將出嫁，認真係雙喜臨門。
大女有咗 細女將嫁
卓妮見Crystal身形冇乜變化，原來佢啱啱有咗三個月。佢嘅丈夫邢高福（Jimmy）話，已經決定太太到時要剖腹生產，事關自然分娩閒閒地要捱十幾小時陣痛，佢唔忍心太太受苦，所以寧願擇吉日開刀生產。至於改名，都係搵個命理師傅改個靚名。
記得王庭聰喺嫁女喜宴上被問到想幾時抱孫時，佢仲話唔急得，估唔到咁快有喜訊。話時話佢擔任國際小母牛香港分會籌款委員會副主席多年，一直慷慨解囊，就算嫁女時收到百萬禮金都捐出去，莫非呢啲就叫好心有好報？