中環出更：三子殘晒 拉布隨時玩完
立法會「拉布」三子上周起就財政預算案撥款發動「拉布」戰，可惜作戰四日，三子身體已經響起警號，莫講話通宵開會「開夜車」加快進度，就算星期一、二加開會議，睇怕三子都捱唔住。「慢必」陳志全尋日出席人民力量成立三周年晚宴時坦言，事旦一個瞓低，其餘二人都撐唔住喇，咁咪分分鐘自我剪布？
人力公文袋 派人赴台「執三攤」
慢必坦言，「拉布」四日加上其他委員會會議排晒落星期一、二開會，把聲幾乎冇休息過，加上連日同反對「拉布」嘅王國興動真火，搞到聲沙沙冇乜氣，擔心隨時病倒。唔單止慢必有事，「長毛」梁國雄亦無端端腸道唔暢順引發便秘，而陳偉業（大舊）亦因為長期唔夠瞓，搞到熱氣牙肉腫痛，對「拉布」發言唔多吉利喎。
另外，曾參選南區區會海怡西選區補選嘅袁彌明（Erica），今日會繼陳家珮、區諾軒後，「執三攤」赴台抗議海怡西商場改建outlet（特賣場），公民黨陳家洛亦派代表赴台「趁墟」，難為當地嘅海怡西商場業主要連日應酬佢哋。
卓妮