創立剛滿一年零一個月嘅真普選聯盟（真普聯），近來認真運滯。先有人民力量同社民連喺佔中商討日臨時轉軚，呼籲支持者唔好支持真普聯提出嘅三軌方案，集中票源支持人力方案，結果引起泛民分裂風波。聽聞佢哋內訌愈演愈烈，真普聯原定下周五舉行籌款晚宴，尋日突然決定押後，原因係民主黨決定閂水喉，唔肯「買枱」喎！
真普聯召集人鄭宇碩承認，現時內部分歧嚴重，擔心籌款唔會有好成績，所以決定押後晚宴，強調押後晚宴係佢嘅決定。究竟發生咩事呢？據八卦友話，白鴿黨六位議員其實一早決定每人出錢買一張枱，盛惠九千六百元，主席劉慧卿同單仲偕已畀埋錢。其餘各黨議員亦有「認頭」，又有善心人捐出物品拍賣，籌款晚宴其實進行得都算順利。
不過，日前民主黨公開指摘人力背信棄義，揚言考慮退出真普聯後，原本應承買枱嘅議員紛紛轉軚，黃碧雲仲講到明「斗零都唔會畀」，搞到咁嘅地步，難怪鄭宇碩要緊急叫停個籌款晚宴喇！