高鐵工程嚴重延誤嘅醜聞愈揭愈多，議員好似執到寶咁，建制同泛民罕有齊齊掉轉槍頭指向政府，利用立會大會書面質詢嘅機會輪流炮轟政府，睇怕運輸及房屋局局長張炳良有排冇覺好瞓喇！
根據立法會文件，今個月二十一日大會嘅二十二條口頭同書面質詢中，原本只得一條同港鐵有關，即係慢必陳志全擬就東鐵綫列車延誤問責，但係突然增加至四條，多咗陳克勤、林大輝同郭家麒臨急改稿追問同港鐵連串醜聞有關事宜，睇嚟都係為咗增加「收視率」。
克勤問沙中綫土瓜灣站地盤發現宋元時期古井對工程影響；大輝及郭家麒嘅問題就成匹布咁長。其實港鐵除咗高鐵延誤之外，包括興建中嘅沙中綫、南港島綫同西港島綫都陸續被發現甩漏多多，隨時又要超支兼延期通車，議員要向港鐵抽水催谷民望，又使乜心急呢？