政情：梁君彥瞓覺大過天
立法會拉布戰持續，面對每日要困喺立法會幫手湊人數，剪布又遙遙無期，唔少建制派都諗計突圍。最近有人密謀要求通宵開會，企圖藉此大量消耗拉布議員體力，等佢哋一頂唔順就即刻要求剪布。不過呢個建議得唔到廣泛支持，據聞經民聯梁君彥（Andrew）就驚冇覺好瞓，所以唔肯制。咁又係，如果大家因此搞到真係「經脈亂」，就得不償失喇！
稱24小時開會不人道
Andrew咁大反應，皆因佢係內務委員會主席，當立法會主席曾鈺成行開行埋時，Andrew就會坐上主席位出任代主席一職。一旦立法會真係通宵開會，Andrew就起碼要做足半日代主席，落咗嚟仲要扮演議員角色，都咪話唔辛苦。我哋問過Andrew，佢就話自己唔支持通宵開會係因為立法會要有標準工時，廿四小時開會唔人道喎。
工程界盧偉國都話反對，因為唔想見到議員捱到病。除咗經民聯外，據悉泛民各黨都唔支持通宵開會，原因離不開唔想咁辛苦。不過支持嘅建制派大有人在，新民黨副主席田北辰話，自己每日只係瞓三個鐘，通宵開會對佢嚟講問題不大，只要令拉布議員投降，無論咩辦法佢都會支持。
建制捱到 除咗經民聯
自由黨鍾國斌都話，依家每星期只係開三日會，加加埋埋都係三十幾粒鐘，拉布議員每晚可以抖抖回氣，第二日繼續精神翼翼繼續拉布，十分不智。所以佢話只要主席決定通宵開會一、兩日，就可以追番晒所有時間。民建聯陳恒鑌亦支持捱夜開會，仲話自己讀書嗰陣都會通宵做論文，貪可以一氣呵成，快啲寫完。如果立法會通宵開會，拉布議員就可以盡情發揮，想講幾耐就幾耐，唔使就住就住喎。
綜合以上咁多人意見，其實民建聯、工聯會及自由黨都支持通宵開會，只係經民聯及泛民唔同意。不過又好合理嘅，大家都知早睡早起身體好，何況好多議員年紀唔細，廿四小時作戰又點頂得順，到時搞出咩意外就唔好喇！
卓妮