政情：中環出更：餐廳唔借廁所 張宇人話有理
立法會議員蔣麗芸（Ann）日前呼籲本港食肆開放廁所畀遊客，費事佢哋因為人有三急而求其搵個地方「方便」。不過，飲食界議員張宇人（Tommy）尋日就為食肆被指唔肯借廁所一事平反，話全港公廁數目寥寥可數，如果唔係飲食界樂意對外開放廁所，香港分分鐘會遍地「黃金」喎。
太污糟恐停牌
Tommy解釋，飲食業本住「顧客至上」嘅宗旨，唔少餐廳都願意對外開放廁所，雖然有啲餐廳會喺門口貼出「洗手間恕不外借」嘅告示，但咁樣只係迫不得已。佢話當餐廳對外開放廁所，如果搞到勁污糟，衞生督察就會向餐廳東主發出告票，扣多幾次分甚至停牌，一時好心可能未必有好結果。不過，Tommy話如果旅客真係好有需要的話，絕大部分餐廳都會外借廁所。
作為飲食業界代表，Tommy幫餐廳講嘢似乎係理所當然，但其實佢都有借廁所親身經歷，自爆當年競選時都曾經問過啲餐廳借廁所，對方亦冇拒絕，所以批評阿Ann嘅言論係畫蛇添足喎！
卓妮