勞工界經常話要爭取最低工資、標準工時，但根據勞工處一個搵工網站顯示，身為勞工界議員嘅郭偉強竟然用每月四千元嚟聘請議員助理，資歷仲要係專上教育或學位課程、識講良好粵語、普通話同英語、識讀寫中文同英文及修讀大學社工系、公共政策或其他科學系添。要求咁高，但得嗰四千元一個月，莫非偉強係講一套做一套？
睇真啲，原來呢份係兼職工作。雖然要求高，每月得四千元，但每周只須工作三日，每日工作四小時，即係平均時薪八十三元，以時薪嚟睇，份人工都唔係咁過分。偉強話，除咗歡迎有學歷同經驗嘅朋友應徵份工之外，亦歡迎學生嚟試吓，因為青年人可以藉此接觸社會。咁依家請到人未呢？偉強就話仲未，但已收到十幾份申請表，估計會於下星期陸續安排面試喎！