中環出更：「曾湯」毀港廉潔 覺光大師籲戒貪
香港佛教聯合會會長覺光大師尋日出席活動時話，浴佛唔係要浴個佛像，而係要浴心，要反省自身、清除貪心。副會長黎時煖居士亦都話，依家社會上唔少人因物欲及被不良資訊影響，心靈受到嚴重污染，期望世人要迷途知返咁話。近年「貪曾」前特首曾蔭權爵士同「貪湯」前廉政專員湯顯明嘅貪腐醜聞影衰香港，兩位佛門中人今次不約而同呼籲大家戒貪、戒物欲，莫非連佢哋都對「雙貪」搞到香港污煙瘴氣睇唔過眼？
要反省除惡
年過九旬嘅覺光大師語重心長咁叫大家要反省自身，清除貪心、怨憎心同埋無知無明嘅心，如果人人都有慈善心、喜捨心及感恩心，社會就會和諧，人心亦會安寧。黎時煖居士亦話，社會上唔少人嘅心靈都受到嚴重污染，搞到行為失常，令到佢哋好憂慮。佢深切關注中華民族優秀嘅禮義廉恥、珍貴嘅文化教育都有日漸熄滅之勢，呢啲亦係社會前途嘅隱憂。佢亦都期望世人可以迷途知返、守戒除惡、尊心向善咁話。
卓妮