立法會議員梁國雄（長毛）前日在開會期間表演食狗餅，事件仍然餘波未了。被長毛出言侮辱嘅事件主角工聯會王國興（阿王）尋日話，長毛食緊狗餅時佢咁啱離開會議廳去咗睇文件，但佢就寸爆長毛此舉係自我降格，自認係狗，佢會好尊重咁話。
早前長毛喺內務委員會上大鬧撥款興建高鐵浪費公帑，又話興建高鐵嘅資金足夠阿王食十八代狗餅，後來被指言語冒犯阿王時，長毛就聲稱狗餅係可以畀人類食嘅，議員蔣麗芸唔抵得，於是叫司機買一盒狗餅送贈長毛，點知佢真係攞嚟食，而且食到津津有味。
阿王直批長毛食狗餅係一場鬧劇，雖然長毛對佢出言不遜，但佢唔會發嬲亦唔會計較，事關長毛咁樣攻擊人正正反映返佢嘅人格水平，公眾自有判斷喎。咁立法會係咪應該規管議員行為呢？阿王就話有規管當然好啦，但係立法會連議員「拉布」都管唔到，談何容易吖！