資訊科技及廣播事務委員會尋日召開特別會議，邀請關注團體埋位討論成立創新及科技局（創科局），商務及經濟發展局局長蘇錦樑（Greg蘇）唔敢怠慢，搵埋政治助理陳百里「吹雞」，號召唔少建制派團體出席公聽會撐場。不過，環顧尋日八十幾個發言團體，燕瘦環肥樣樣有齊，有飲食界商會仲踩過界，不惜以雞蛋仔借喻力撐成立創科局，會唔會低科技咗啲呀？
叙福樓集團執行董事黃傑龍（Simon）尋日以稻苗學會主席身分現身發言，甫開口就話冇入錯門口，指學會雖然係餐飲業商會，但科技從來唔係一門獨立產業，而香港飲食業喺應用科技方面完全係「跑輸大市」。佢又話，台灣已經有人發明咗製作雞蛋仔機器，按個掣就可以代替人手反轉部機，焗雞蛋仔嘅另一面，免卻手腕勞損，可惜香港遲遲未引入，所以支持成立創科局喎。
一底雞蛋仔都可以將餐飲業同創新科技扯上關係，但相信政府最有興趣嘅係更高層次嘅高端科技囉，今次Greg蘇會否搵錯人撐場呢？