政情：釋智慧中風 貪曾罪孽重
大嶼山寶蓮禪寺尋日舉行一年一度嘅浴佛慶典，見番久違了嘅方丈釋智慧法師。相信大家會記得佢多年前曾經不幸中風，即使康復後，近年亦已好少出席公開場合。難得見到智慧法師，當然要問候吓佢身體狀況如何啦，佢就話中風之後身體唔係咁好，仲大爆當年之所以中風，全因為「貪曾」前特首曾蔭權爵士所累。估唔到貪曾除咗貪腐之外，仲搞到人中風，罪孽真係厚過電話簿！
足足18日冇法講嘢
智慧法師吐真言話，○八年北京主辦奧運會嗰年，時任特首嘅貪曾到大嶼山視察，當時包括佢在內嘅一班離島區議員要陪貪曾周圍行。當年智慧法師已經係七十幾歲人，仲要陪住貪曾喺烈日下暴曬幾個小時，試問又點樣頂得順吖？所以智慧法師就好婉轉話，可能因為咁，佢就腦充血（中風）喇，之後仲足足十八日冇法講嘢添！
嘩！呢個真相真係好得人驚，原來智慧法師中風竟然係貪曾有關。難為大師咁多年來忍住隱藏秘密多年，認真阿彌陀佛！唔怪得啦，自從智慧法師中風入院康復後，每次出來見人，佢就會重提一次中風後身體狀況唔好，有次仲講到眼濕濕，好似好難釋懷咁，貪曾認真係累人累物。幸好智慧法師至今依然咁精神，否則都無法講出中風嘅真相，莫非係佛祖保佑？
寺務交師兄 「似足CEO」
智慧法師講講吓又爆勁料，正因為自己身體唔好，所以已將寺院事務交畀師兄健釗法師，而佢自己就做看門工。呢番說話又係令人大吃一驚，事關早幾年寶蓮禪寺曾爆出接班人之爭，當年智慧法師曾公開表示健釗係佢嘅接班人，豈料幾年後，佢突然指宏通法師係寶蓮禪寺「未來方丈」，引起一場佛門接班人風波。
究竟今次健釗法師接棒係真定係假呢？智慧法師就好認真將健釗法師介紹畀傳媒認識，仲形容健釗依家就好似寶蓮禪寺嘅CEO（行政總裁）。咁佢有冇諗過退休？智慧法師就話，佢做看門工會「做到做唔到為止」，仲話做看門工一啲都唔容易，淨係照顧寺院二百幾人嘅膳食都好費工夫。講到底，究竟寶蓮禪寺嘅CEO權力大啲吖，定係看門工大啲呢？睇嚟少啲慧根都好難參透，阿彌陀佛！