政情：中環出更：陳恒鑌叫司長做「袁腳強」
活動或節目主持人唔識讀嘉賓姓名係大忌，而識讀但又讀錯嘅話就係大忌中嘅大忌喇！好似立法會議員陳恒鑌（Ben）尋日代表新界各界主持一個活動時，就接連讀錯律政司司長袁國強（Rimsky）嘅名做「袁腳強」，搞到身旁嘅新社聯理事長陳勇都笑佢可能係太緊張講錯嘢。究竟係阿Ben開口夾着脷吖？抑或係佢想幫袁國強改花名呢？
聲稱係球場上花名
阿Ben就話，佢之所以叫「袁腳強」，其實係叫慣咗Rimsky嘅花名，所以一時間改唔到口啫。佢話，其實「袁腳強」係Rimsky喺足球場上嘅花名，因為佢哋一齊踢波時，Rimsky出名好波，所以大家喺球場上都會叫佢做腳強喎。阿Ben呢個解釋又似乎兜得幾靚喎，唔知係咪真嘅呢？不過，就算真係阿Ben老作，相信「袁腳強」都唔會咁得閒出來澄清啦。
卓妮