政情:中環出更:「韓星」派對 名人鬥扮嘢

《星星》韓劇風靡全城,帶動韓風熱爆,連城中名人都扮「韓星」湊熱鬧。香港品牌總商會會員朱仲賢(Billy)日前就自掏腰包搞個表演晚宴,叫齊好友參與角色扮演,又唱又跳high足一晚。當晚除咗玩具大王蔡志明姪兒蔡加頌(Gary)同太太盧靜賢(Jane)出席外,品牌總商會副會長陳曼芝(GiGi)與鄧乃蔚(Raymond)都有到場湊熱鬧,並擔任大會評判。

「蔡加頌似金秀賢」

Jane係超級韓劇迷,近期迷上韓星金秀賢,經常煲劇至深宵。Gary話,見太太拎住部平板電腦睇得咁開心,心思思想煲埋一份,可惜玩具生意忙到飛起,寧願早睡早起。

嚟緊Gary一家會去首爾旅行,親身感受韓風。Jane就笑笑口話,佢老公天生「眼細細」,好似金秀賢咁有型喎,所以唔使去首爾追星都咁開心。

至於Billy就專登染一頭金髮扮韓星,但韓文唱腔一般,勝在舞技夠放搭夠。Billy話,今次晚宴旨在鼓勵有才華嘅年輕人參與台前幕後製作,發揮所長。GiGi就話,年輕人思維大膽創新,創造力強,而企業家就製造力強,兩者互動,相信會擦出更多火花,所以商會未來將舉辦更多分享會同年輕人交流。

講到創意,本身係鞋履設計師兼老闆嘅Raymond就趁零售市道回軟,將開設多間一站式購物店。佢話呢個時候租舖容易咗,擴充業務正係好時機。

卓妮

第一手消息請下載on.cc東網iPhone/iPad/Android/Windows Phone Apps