政情：廣東社團總會五區插旗
早前我哋寫過，將於今年六月換屆嘅廣東社團總會（總會）爆發爭位戰，全國政協常委陳永棋（棋哥）同客屬社團聯合總會會長梁亮勝，都有意爭做現任主席王國強嘅繼任人，現時由楊志紅出任嘅「大內總管」秘書長職位，亦有唔同派系嘅人爭住做。消息話呢場領導班子爭奪戰經已落幕，棋哥最後大熱跑出擔任主席，秘書長則由王國強老友、香港專業人士協會前主席簡松年接掌。據聞新領導層未上任已有新搞作，密謀殺入立法會五大選區開設地區辦事處，大力招收會員同服務社區，與現有嘅各大建制派政團搶客。令人懷疑總會欲由過往選舉票倉兼地區椿腳，轉型為直接派人角逐嚟緊幾年嘅各級選舉。
「陳簡配」任新領導
最近關於廣東社團總會換屆嘅消息滿天飛，當中包括唔少負面新聞、傳聞，甚至醜聞。消息透露，總會內部與操盤人早前終於協調好接班安排，由棋哥與簡松年組成「陳簡配」，分別出任主席同秘書長，並已為未來三年任期內嘅工作做好規劃，其中一個重要舉措，就係首次打正總會嘅旗號，按照立法會五大選區劃界，分別開設五個地區辦事處，目標係喺今年內成事。
香港人工高、租金貴，要喺五大區都開設一間有番咁上下規模嘅地區辦事處，第一樣諗到嘅梗係個錢字！據聞有人粗略估計，有關開支每年至少要幾千萬元，好彩總會內最唔缺嘅，就係肯為國家同香港嘅繁榮穩定「貢獻」嘅有錢人，相信資源絕對唔係問題。問及總會又出錢、又出力，將來會否直接派人參加未來嘅多場選舉，消息對此就不置可否，僅稱要先做好地區工作喎。
加設常務副主席
總會另一項新動作，就係改革總會嘅領導架構，據聞會喺主席和副主席之間，再加設多一層常務副主席職位，專畀本港各個廣東懸市同宗族嘅社團領導人出任，例如河源社團總會、惠州社團聯合會等，因此梁亮勝可透過客屬社團聯合總會代表名義升任常務副主席，至於原有嘅副主席位置，則留畀有關社團嘅第二梯隊出任，希望畀機會啲年青一輩上位磨練。