中環出更：陳曼琪政改交流 律師會急遮嘜頭
由黃大仙區議員陳曼琪（Maggie）牽頭成立嘅香港中小型律師行協會，尋日邀請律政司司長袁國強出席政改閉門交流會議，地點選址香港律師會會所，唔講仲以為係律師會發起嘅活動。不過，律師會為免傳媒誤會，趁會議開始前急忙派人搵白紙遮住律師會個嘜頭，提防影射，睇嚟律師會想同協會劃清界線喎。
倡佔中三子覆核挑機
協會尋日公布兩成六回覆率嘅調查結果，指出七成六受訪會員唔支持「佔領中環」行動（佔中）。Maggie更以個人身份，引用案例反建議佔中三子，大可趁政府向人大常委會提交首輪政改諮詢報告時，向政府提出司法覆核「挑機」代替佔中喎。建制派一向好反對司法覆核，Maggie咁樣反其道而行認真出位，難怪向來同建制派關係良好嘅律師會，都要遮嘜頭明哲保身。
講番個協會，事務律師同大律師會員人數加埋得六百幾人，對比全港有七千四百幾名事務律師，果然貫徹其「中小型」規模，代表性有眼你睇，加上黃國恩及盧懿杏兩名副會長清一色來自民建聯，協會更邀得基本法委員會委員譚惠珠擔任榮譽顧問，建制味甚濃。
卓妮