中環出更：批准千二修訂 「曾」靠害
根據近兩、三年慣例，每年立法會審議《撥款條例草案》（財政預算案）時，似乎都少不免出現「拉布」場面。尋日立法會主席曾鈺成正式批准多二百幾項議員修訂，令總修訂數目高達一千二百項。去年「拉布」戰都搞咗近七十個鐘，睇怕今年「拉布」戰突破百個小時都唔係難事，怕且鬍鬚曾要諗定計仔點樣捱更抵夜，否則身體出事就大鑊喇。
鬍鬚曾睇怕頭痕
曾鈺成尋日批准嘅修訂，由議員梁國雄（長毛）提出，由於主席容許佢再補交新修訂，所以佢就漏夜提交二百三十二項修訂，結果全數獲主席批准。唔通曾鈺成又放水畀長毛？睇怕都係嘞，話晒「拉布」原因係長毛不滿政府拒絕制訂全民退休保障，由於呢個大頭佛係政府搞出來，曾鈺成又唔係政府中人，當然唔會主動攬上身啦！
不過，究竟曾鈺成係咪想靠害鬍鬚曾，就要睇佢幾時「剪布」。今次修訂比去年多出一半，如果去年用咗七十個鐘審議，今年一定更多，如果曾鈺成唔「剪布」，睇怕去到暑假都未必審完。不過，佢次次都係要去到最後關頭先講幾時「剪布」，睇嚟鬍鬚曾除咗諗定方法抵抗睡魔來襲之外，仲要金睛火眼睇實幾時「剪布」至得。
卓妮