中環出更：教院廿年慶 鄭國江贈《燭光》
香港教育學院（教院）眨眼間已成立二十年，即使未正名為大學都要賀一賀，除咗出版特刊《教院人．師範生》外，尋日仲特別邀請民政事務局前局長藍鴻震（藍爺）、著名填詞人鄭國江、時裝集團包浩斯主席黃銳林（George）、擔任視藝科老師的十大傑出青年張寶雯等名人校友趣談教院往事。
六十年代畢業於葛量洪師範學院嘅鄭國江，感恩當年受美術教育薰陶，先至創作出《在水中央》等如此雋永嘅歌詞。藍爺竟笑言，好彩鄭當年沒有選擇教官校，否則香港就冇咗個填詞人才喇！此話可解？
盼照亮學生路途
鄭國江透露，多得任教多年嘅津貼學校容許佢兼職填詞，先至創作出包括《IQ博士》等經典兒歌和金曲。同場校友藍爺就慨嘆，好彩鄭國江當年冇任教官校咋，因為任職官校身份等同公務員，掣肘多多，肯定唔可以兼職填詞。言下之意，即係鄭當年入官校反而會埋沒才華？而藍爺作為羅富國師範學院畢業生，當然力撐教院正名為大學係必然嘅事，自言早已當教院係大學，時刻都對教院出身感到光榮添！
講開又講，多得鄭國江當年執起支筆填詞，如果唔係「財爺」曾俊華點會引用到由佢填詞嘅《交叉點》歌詞：「不信命運，但信機會」，為年初嘅財政預算案作結呢？鄭國江仲向教院送上一曲《一點燭光》，寓意為人師表即使好似燭光咁微不足道，亦發揮緊影響力照亮好多學生嘅人生，相當有意思。
同場仲有一手創辦包浩斯（Bauhaus）時裝集團嘅柏立基師範學院畢業生George，原來他創業前教過十年書，佢坦言因當年體育老師一句：「最緊要老實，唔好怕核突」，時刻警醒佢做生意要坦誠，可想而知老師說話對學生嘅重要性。
其實教院在二十年前，由羅富國師範、葛量洪師範、柏立基師範、工商師範及語文教育學院五間師訓學院合併而成，多年來傑出校友輩出，好似世界衞生組織總幹事陳馮富珍、已故前支聯會主席司徒華，同政制及內地事務局副局長劉江華都係師範出身。
卓妮