政情:收料站:未雨綢繆九龍社聯搵新血

最近城中社團政治動作多多,連形象老派嘅九龍社團聯會都突然活躍起嚟。我哋收到風,九龍社團聯會早前舉辦第一期政治議題講座,反應唔錯,近日又開辦第二期講座,探討包括選舉與競爭等政治議題,並邀請到嶺南大學公共管治研究部主任李彭廣及立法會前議員程介南等主講嘉賓授課,聽起上嚟拍得住民建聯嘅政治專才文憑課程。莫非佢哋想喺地區收新丁,打正旗號參選?

有知情人士就承認,大部分參加講座嘅都係透過聯會旗下五個地區組織推薦,或者係其餘幾十個屬會嘅義工。

備戰2020年立會選舉

佢哋嘅課程主題咁嚴肅,目的都係想培育地區新血,為二○二○年普選立法會做好準備咁話。二○一六年立法會選舉都仲未到,同埋二○二○年立法會係咪真係有普選,依家仍未有定案,九龍社團聯會咁早就未雨綢繆,睇嚟會長陳振彬及理事長王惠貞似乎真係志在必得喎!

第一手消息請下載on.cc東網iPhone/iPad/Android/Windows Phone Apps