中環出更：初訪廉署 陳仲尼冇飲咖啡
最近中港政商圈子屢傳有貪贓枉法分子被調查。咁敏感嘅時刻，身兼考試及評核局主席嘅全國青年聯會副主席陳仲尼（Rock）尋日早上九點四十五分左右突然現身廉政公署，見佢入去時行色匆匆，神情有啲緊張，認真耐人尋味。卓妮第一時間致電阿Rock問個究竟，證實係虛驚一場。
被抽中去巡視認人程序
阿Rock笑笑口話，自己係以太平紳士身份去視察廉署，主要係睇吓認人程序係咪符合公正、公平原則，期間逗留大約一個小時。雖然係隨機被抽中去巡視，不過阿Rock都好認真，仲即時察覺疑似唔公平嘅安排。話說廉署當時進行緊真正嘅認人程序，佢見到八個演員扮嫌疑人，但係該批演員嘅衣着、外表同埋年紀各不相同，佢即刻提出意見，事關嫌疑人唔係應該有一定特徵咩？
阿Rock仲話，今次係佢咁大個人第一次踏足廉署，點知就被卓妮撞到，佢事後為免大家諗多咗，仲特登send廉署邀請佢去巡視嘅信件畀卓妮參考添！咁廉署有冇請佢飲咖啡？阿Rock笑稱：「冇喎！連杯水都冇！」
卓妮