外號「李漢奸」嘅民主黨創黨主席李柱銘同外號「民主阿婆」嘅前政務司司長陳方安生，早前就政改問題出訪美加「唱衰香港」，被內地官媒連日點名炮轟佢哋「賣港求榮」。尋日兩人又畀人鬧，而且仲係泛民嘅盟友，質疑兩人訪美只會畀藉口中央同建制派抨擊泛民，無助爭普選，簡單講即係話兩人「累街坊」囉。
真普選聯盟召集人鄭宇碩尋日出席一項活動時，被問及對李漢奸同民主阿婆訪美嘅睇法，佢一方面話好尊重對方嘅做法，但另一方面又指咁做難免會畀中央同建制派人士話柄，攻擊香港泛民嘅爭取普選運動有外國勢力干預。佢強調政改係本地事務，尤其喺政改諮詢期間，真普聯嘅立場一向係小心謹慎，盡量減少畀建制派攻擊嘅機會，盡可能都係留港同特區官員傾，從冇諗過飛去第二度爭取外國政府幫手，變相狠狠摑咗李漢奸同民主阿婆一巴！
鄭宇碩今次學精咗，都係因為上次衰過。心水清嘅人記得，去年鄭教授聯同佔中發起人朱耀明及支聯會主席李卓人，走咗去台灣與民進黨前主席施明德會面，事後畀中方同建制派圍攻佢哋勾結「台獨」勢力，之後佢哋就取消晒所有訪台行程，以免節外生枝。李漢奸同民主阿婆咁都唔識吸取教訓，認真抵鬧。