中環出更：傑出校友齊感謝城大
城市大學尋晚舉行傑出校友頒獎禮，社會企業Green Monday創辦人魏華星（Francis）、做家電嘅科匯工業董事總經理何稼楠齊獲殊榮。Francis回憶當年報考大學時，成績麻麻，原本家人已打定輸數送佢到海外升學，佢阿姨仲幫佢買埋枕頭添！估唔到後來城大收咗佢，先至唔使離鄉別井，仲喺城大認識咗佢人生中好重要嘅一個人，就係佢太太喇！
Francis獲得母校肯定，心情好興奮。佢父母、太太及一對子女都去現場為佢打氣，連佢口中嘅「枕頭阿姨」都有到場。Francis笑笑口話，由於城大收咗佢，所以個枕頭一早已經不知所終。卓妮見佢行路要用拐杖，唔知有咩事呢？熱愛長跑嘅Francis就話，因為佢跑步跑得太多，膝蓋移位，依家睇緊中醫調理。
何稼楠提攜學弟妹
至於做家電嘅何稼楠好有心，唔只經常捐錢畀母校，仲時刻掛住提攜城大學弟學妹，依家仍然同學校合作鑽研，致力做好創意工業。佢話自己做家電唔同人哋鬥平、鬥多，專走高增值路線，所以唔使到外地設廠，最終令香港社會得益。何稼楠喺慈善家兼工業家陳瑞球嘅手中接下獎座，零舍開心。
城大話咁快成立三十周年，校方趁機推出一本新書《三十而立》，由三十位城大校友分享成功之路，包括○八年殘奧會香港馬術代表葉少康及環境局副局長陸恭蕙等人。葉少康力爭上游嘅故事夠晒勵志，年輕人多啲聽吓佢嘅故事，相信會有得着。
卓妮