政情:坪洲鄉會修章 踢走林偉強

繼屯門及廈村鄉事委員會獲當區民政處確認修章,剔除太平紳士可直入鄉委會的條文後,坪洲鄉委會三年前亦向離島民政處申請修章,據聞該處經過多年審批後,近日先確認相關內容。

太平紳士不可再直入委

相信呢個改變將對鄉議局副主席林偉強影響最大,皆因佢喺一○及一一年喪失鄉委會主席、離島區議會當然議員及區議會主席席位後,近年都係靠新界太平紳士身份嚟做坪洲鄉委會當然議員,依家修章獲確認,換句話講,林偉強自此喺坪洲就咩都唔係囉!

不過,原來鄉郊仲有個規矩,就係想參加當區鄉郊代表選舉,必須喺選前於坪洲連續居滿六年。只不過,林偉強已搬離坪洲多年,而個選舉年底就嚟舉行,點睇佢都趕唔切,就咁被踢出坪洲嘞。至於佢喺鄉議局嘅地位會唔會受到影響呢?據聞鄉議局主席劉皇發(發叔)近年對林偉強唔投入鄉議局工作頗為不滿,所以林偉強想平穩過渡去下屆鄉議局,真係要勤力至得喇!

第一手消息請下載on.cc東網iPhone/iPad/Android/Windows Phone Apps