政情：謝偉銓愛做「王老五」
立法會建築、測量及都市規劃界議員謝偉銓（Tony），加入議會都已經接近兩年，至今仍然保持「單身」，未肯加入任何政黨或其他政治聯盟。Tony話，其實過去兩年新民黨同經民聯都試過向佢招手，但業界希望佢保持獨立多啲，所以惟有請兩個黨食檸檬。
Tony話，唔入黨有兩個原因，第一係需要多啲時間尋覓理念相同嘅政黨，第二係自己競選時係無政黨背景，如果貿貿然加入某一政黨，選民可能會唔太高興，所以今屆任期內都唔打算加入政黨。
DSD將提「處男修訂」
不過唔入政黨唔代表唔做嘢，稍後佢會就雙倍印花稅（DSD）提出「處男修訂」，建議延長市民「樓換樓花」嘅退稅期限，即如果市民買第二層樓係樓花時，只要在收樓後半年再賣出第一層樓，就可獲退回雙倍印花稅。佢第一次做修訂就係地產議題，唔怕被人話佢偏幫發展商咩？Tony承認建議有可能推高樓價，但就拍晒心口強調個建議係自己諗出嚟，從無同任何發展商商量過喎！